Rabu, 16 Februari 2011

sejarah situmorang


oleh MUDA MUDI SI 7 AMA MEDAN pada 02 Juni 2010 jam 20:38
MULA NI MARGA SITOHANG DOHOT SAOTIK PARADATON NI NA 7 AMA TURUNAN Op. Tuan SITUMORANG:

SITOHANG ima pahompu siampudan ni si Raja Lontung sian anakna sihahaan Tuan Situmorang.

Tuan Situmorang anakna dua:
1. Panoparaja (sihahaan)
2. Ompu Pangaribuan (siampudan)
Na mandapot goar SITOHANG, di pesta ni 'ama' na Tuan Situmorang. Ala tibalna dipeakkon di atas ni TOHANG. Sude raja2 na jinou dipesta I, mandok SITOHANG ma goar ni Ompu Pangaribuan. Dungi ditolopi amana Tuan Situmorang.

--> Panoparaja, anakna dua:
1. Ompuniambolas
2. Parhujobung

--> (Ompu Pangaribuan) Sitohang, anakna sada;
1. Raja Babiat


Ompuniambolas anakna dua:
1. Lumbanpande
2. Lumbannahor

Parhujobung, anakna dua:
1. Suhutnihuta
2. Tuan Ringo

Raja Babiat, anakna tolu:
1. Darimangambat
2. Rajaitubungna
3. Ompubonanionan

Ahado lapatan ni Na 7 AMA TURUNAN NI OMPU TUAN SITUMORANG?
Ia Tuan Situmorang dohot ninina Na 7 ima:
1. Lumbanpande
2. Lumbannahor
3. Suhutnihuta
4. Tuan Ringo
5. Sitohang Uruk Darimangambat
6. Sitohang Tonga-tonga Rajaitubungna
7. Sitohang Toruan Ompubonanionan, Mangolu dope;

Alai (2) dua anakna Tuan Situmorang;
1. Panoparaja
2. Sitohang.

Dohot pahompuna (3) tolu;
1. Ompuniambolas
2. Parhujobung
3. Rajababiat;

Nungnga parjolo marujung ngolu.

Dijou OMPU TUAN SITUMORANG on ma ninina na 7 i. Didokma:
"Hamu niniku . Ia ompu muna (2) dua, dohot ama muna (3) tolu nungnga mate. Saonari anakku na 7 (nini= mangulahi didok anak dinampuna nini. Nini mangulahi marama tu amani ompuna): hita naualu makkatai huhut marbulan (marbulaban) di bona ni Jabijabisisangapan na martua na marsangap on. Dohononhu tu hamu na 7, SI 7 AMA ma dohonon muna pomparan muna na 7. Jala pomparan muna na 7 ndang jadi marsiolian. Boru muna na 7 ndang jadi marsitindian. Sisada lulu dianak dohot boruma hamu na 7, sahat ro di sogot ni sogotna. Songon hata ni patipatianma dohonon: Dengke ni Sabulan, Tu tonggina tu tabona; Ise siose padan, tu ripurna tu magona. Olo, amang ninna na 7 i. Tanggo urat ni bulu, Tanggoan ni dokni padan. Olo, amang ninna anakna na 7 i."

Jabi Jabisisangapan (di Urat) ma parrapotan ni TUAN SITUMORANG dohot pomparanna na 7 i. Molo uli do hasil ni rapot di Jabijabi Sisangapan, Jabijabi Sisangapan ma goar ni Jabi jabi I di na ni rapothon na i. Alai molo so uli hasil ni rapot i, Jabijabi Singisngis ma goar ni jabijabi I dinadirapothonna i.

Umpamana:
"molo dioli anak ni SI 7 AMA, diraporhon ma I di Jabi jabisisangapan asa sirang. Molo olo sirang, Jabijabisiangapan ma goar ni Jabijabi I di nasida. Molo ndang olo sirang, Jabijabisingisngis ma goar ni Jabijabi I di nasida. Ngisngis ndang maranak marboru jala ndang dapot panganon."

Sombaonsimundea (di Urat), dison ma partonggoan ni Tuan Situmorang dohot pomparanna, mangido tu Mulajadinabolon asa torop pinompar, sinur na pinahan, gabe na ni ula, torop aleale, ro hasangapon. Jala dison muse ma mangido hatunduhan ni hasalaan tu mulajadinabolon.

Sibatuara (di Palipi), dison ma pangidoan ni Tuan Situmorang dohot pomparanna Na 7 I tu Mulajadinabolon. Jala dison ma uhum pasidungi tu pomparan ni Si 7 Ama na marsiolian. Ditonggohon tu Mulajadinabolon, asa na so olo sirang I, asa ngisngis ndang marpinompar. Jala na so olo sirang I, molo manjangkit tu hau, tabaan ma hau I, asa rap mate dohot hau i. Molo martabuni tu ramba, surbuon ma ramba I, asa rap mate dohot ramba i. Ia tu aek do ibana lao, arsikonon ma i asa mate nongnongon. Ima togu ni parpadanan (bulan) nipatikkon ni Tuan Situmorang tu pomparanna si 7 AMA sahat ro disalelenglelengna.

Tidak ada komentar:

Poskan Komentar